Меню сайта

Система Orphus

Система Orphus

Нашли ошибку, опечатку, неверную информацию - выделите при помощи ЛКМ и нажмите Ctrl + Enter

Вход

Для зарегистрированных пользователей

Школьные сочинения

 

Школьные сочинения о войне, о людях, испытавших её тяготы и лишения, о памяти, которую нельзя потерять

 

Ыджыд войнаыд петкӧдчис водзвыв

Менам ыджыд мам чужлӧма 1921-ӧд воын. Шулісны сійӧс Шебырева Апполинария Ефимовнаӧн. Сиктса ногӧн кӧ – Епим Полюк. Ӧні сійӧ абу нин ловъя. Но миян паметьӧ коли кыдзи бур сьӧлӧма, уджач да зіль нывбаба. Уджавлӧма 13 арӧссянь кер пӧрӧдысьяслы пусьысьӧн. А война заводитчытӧдз вӧлӧма трактористкаӧн.Me кӧсъя ги-жыштны, кыдзи войнаыс водзвыв петкӧдчӧма йӧзыслы. Висьтавліс ыджыд мамӧ, сылӧн нимсянь жӧ и гижа.

«Гӧрим некымын том ныв. Миян пӧвстын вӧлі сӧмын ӧти зон. Сиктын шулісны Опонь Вась Иванӧн. Виччысьтӧг зонмыд шӧйӧвошӧмӧн горӧдіс: «Видзӧдлӧй, нывъяс! Енэжыс али мый ӧзйӧма?!» Ми чатӧртчим. А сэні... Енэжыс ӧзйӧ гӧрдсьыс-гӧрд биӧн. Вой, а ывлаас быттьӧ луншӧра лун. Но кыдзи вермас ӧзйыны енэжыс? Сійӧ ӧд абу му! Некымын лун бӧрын заводитчис война, лёк, мисьтӧм чужӧма война. Бӧрын нин гӧгӧрвоим, мый Енмыс сетіс сэки сигнал. Но некод эз тӧд, кутшӧм сьӧкыд да кузь лоӧ тайӧ тышыс. Мунісны и том йӧз, и гырысьяс. Муніс тшӧтш и Опонь Вась Иван, коді первойӧн казяліс Енлысь юӧрсӧ.»

Пӧрысь йӧз казьтывлӧны, мый уна ног на петкӧдчывлӧма войнаыд. Неважӧн на олӧмаяс сёрнитісны, мый 94 гӧгӧр морт пӧгибнитӧмаӧсь. Тайӧ лыдыс сӧмын миян сиктын. Ӧти олӧма нывбаба шуис: «Кымын збой да повтӧм сьӧлӧма морт пуктіс ассьыс юрсӧ, медым миян олӧмным вӧлі югыдӧн».

Лажанева Евгения
8 «б» класс, 2005 во

 

Ичӧт челядьлы войнаыд инмис жӧ ...

Менам ыджыд мам Сенькина (Шахова) Нина Алексеевналы война заводитчигӧн вӧлі куим арӧс. Мый ме гижи, вӧлӧма збыльысь. Ыджыд мам нимсянь и нуӧда сёрнисӧ.

«Война суис миянӧс Пожӧгын. Me зэв бура помнита, кыдз батьӧс нуисны война вылӧ 1941 вося июль сизимӧд лунӧ. Керка тыр йӧз. Ставыс бӧрдӧны. А батьӧ босьтліс менӧ ки вылас.

Коми му кӧть лыддьыссис ылі тылӧн, овны тан вӧлі сьӧкыд. Ёна тшыгъялім. Быдлунъя сёяннас вӧлі кач. Косьтасны пу, тоясны да пӧжаласны. Ёна и пыктавлісны татшӧм сёянсьыд. Чукӧртім му вылысь сісь картупель. Сійӧ вӧлі зэв чӧскыдӧн. Пелысь корйысь нянь пӧжавлім. Овлі ме и яслиын. Сэн вердлісны маннӧй рокӧн. Век помнита. Ӧд тайӧ вӧлі озырлун.

Тылын сьӧкыд уджысь унаӧн мӧдар югыдас кадысь водз мунісны. Врачыд ӧд сэки эз вӧв. Менам куліс кык вок да кык чой. Кыкӧн ӧти вежонӧ. Эз тай войнаыд юась, кивыв абу мортыдлы сы сьӧкта дойсӧ кутны.

Но война помасис. Олӧмыс эз вежсьы. Мужикуловыс унаӧн бӧрсӧ эз локны. Няньыд эськӧ лоис. Ме помнита, мамӧ пуктіс 400 грамм нянь. Пырис миянӧ Микита да няньтӧ гусяліс. Сэсся вокӧй суӧдіс да бӧр мырддис».

Ыджыд мам помнитӧ ставсӧ. Да ӧд вунӧдан-ӧ татшӧмтӧ. Уна во мысти сӧмын олӧмыс бурмис. Ыджыд шог вайис война. Мед мӧдысь олӧмсӧ эз нин жугӧд война.

Бугримова Татьяна
5 «б» класс, 2004 во

 

Воклӧн письмӧ

1941 вося июнь 22 лунӧ фашистъяс панісны миян страналы паныд война. Уна сюрс морт муніс фронт вылӧ, медым дорйыны Гитлерысь ассьыным чужан мунымӧс. Кымын курыд шог лои пыкӧма став тайӧ кузь да сьӧкыд война чӧжӧн. Уна мортӧс водтӧдіс война кӧдзыд муӧ кадысь водз. И вот 60 во нин коли сійӧ кадсяньыс, но оз вунны тайӧ лунъясыс налӧн, кодъяс прӧйдитісны сійӧ тыш пырыс. Дерт, ӧні гежӧд нин коли войнаса ветераныд, но век жӧ налӧн рӧдвуж тӧждысьӧмӧн видзӧны налысь паметьсӧ, на бӧрся кольӧм письмӧяс, телеграммаяс и, дерт жӧ, «похоронкаяс».Me висьталышта та йылысь ӧти олӧма нывбабалӧн казьтылӧмъяс пыр, коді быдмис война кадӧ, кодлӧн ыджыд вокыс тшӧтш вермасис вӧрӧгкӧд да пуктіс ассьыс юрсӧ тышас. Тайӧ мортыс лоӧ менам ыджыд батьлы воча вокӧн.

Со мый висьталіс меным Галина ичинь: «Мамӧлӧн да батьӧлӧн ми вӧлім кыкӧн: ме да ыджыд вок. Сійӧс шуисны Шебырев Викентий Егоровичӧн. Чужліс сійӧ 1925-ӧд вося тулысын. Вичкодорын помаліс 8 класс. Вӧлі зэв вежӧра да сюсь зонкаӧн, сы вӧсна мӧдӧдісны велӧдчыны 9-ӧд классӧ Помӧсдінӧ. Кужліс зэв бура мойдны. Вӧлі зэв сӧнӧд, сюртчис спортӧ. Но велӧдчӧм помавны эз удайтчы. Заводитчис ыджыд война. Ас тшӧтшъяясыскӧд вокӧс мӧдӧдісны Сьӧдтыдінӧ военнӧй делӧ нуӧдан курсъяс вылӧ. 1942-ӧд воын нуисны война вылӧ, кӧть сылы вӧлі сӧмын на 17 арӧс. Кык во чӧж велӧдчис Великӧй Устюг карын военнӧй училищеын. Сетісны лейтенант звание. Велӧдчӧм бӧрас веськаліс Польскӧй фронт вылӧ, миномётнӧй взводӧ. Письмӧ вӧлі воӧ гежӧда. Ыстывліс деньга – 300-400 шайтӧн сэк кадся деньгаӧн. Уси сійӧ 1945-ӧд вося февраль 7-ӧд лунӧ Кенигсберг карын. Усьтӧдзыс недыр водзджык сетісны старшӧй лейтенант звание. Воліс и усьӧм йылысь «похоронка».

Вок эз удитлы ни гӧтрасьны, ни лӧсьӧдны челядьӧс. Эз вермы пӧртны олӧмӧ ассьыс мӧвпъяссӧ. Колӧкӧ, кутшӧм прамӧй мортӧдз воис аслас ыджыд сямлунӧн да сюсь вежӧрӧн.

Сійӧс казьтывлӧм вылӧ коли сӧмын бӧръя письмӧыс да карточка. Том лейтенантлысь бӧръя письмӧсӧ ме сета аслам гижӧдын дзик нинӧм вежтӧг. Ті ставныд гӧгӧрвоанныд, кутшӧмӧн вӧлӧма тайӧ мортыс:

«Здравствуйте, уважаемая мамаша и сестра Галя!

Шлю пламенный боевой привет и массу наилучших пожеланий в вашей повседневной домашней жизни и работе. А дальше сердечно благодарю за ваше письмо от 07.12.44 года. Получил я 27.12.44, где сообщаете, что получили 400 рублей. Так же узнал, что праздник провели хорошо.

Пару слов о себе. Пока жив-здоров. Тут польское население проводило праздник Рождество по новому стилю, то есть 25.12.44 г. Но и, конечно, я попраздновал, как раз получил злотые и сходил к ним, попробовал горелки маленько, повеселились.

Коротко о себе ещё. Ждём сигнала для решающего наступления и скоро это будет. Если будет ваше счастье, то может быть, останемся невредимыми, но рассчитать очень трудно.

Как ваше здоровье, мамаша? Я знаю, что вам жить трудно, но ничего не поделаешь, война без слёз не бывает.

Привет всем родным и друзьям, а так же молодым девушкам. Передай привет Марии Степановне, вызывай к себе и передай от меня. Пускай гуляет, но я сердиться не хочу. Встретимся ещё, дорогие.

Крепко жму ваши руки и целую. Ваш сын лейтенант Витя.

Высылаю фотокарточку.

28.12.1944 год».

61 во сайын гижӧм тайӧ письмӧыс дзик нин важмӧма, косясьлӧма дыр кадсьыс, но чойыс век на синмӧс моз видзӧ сійӧс. Шуӧ, пока по ме ачым ловъя, менам сьӧлӧмысь сійӧ оз мун.

Третьяков Иван
8 «б» класс, 2005 во

 

Нывбаба война кадӧ

Заводитчис война. Мужичӧйясӧс, том зонъясӧс, кодъяс вермисны кутны ружье босьтісны фронт вылӧ. Нывбабаяс колины гортаныс и ас, и кӧзяин пыддиыс. Став сьӧкыд удж колис налы пельпом вылӧ.

Менам ыджыд мам, Третьякова Лидия Тимоновна, война заводитчытӧдзыс на петавлӧма верӧс сайӧ, Педот Егор Вась сайӧ. Верӧссӧ война вылӧ босьтӧм бӧрын кольӧ ӧтнас быдтыны пи. Ас овмӧсӧн век овлӧма, кыдз шуасны, скӧтӧн и живӧтӧн: мӧс, кук да ыжъяс. Но регыд ковмас эновтчыны и мӧс-кукысь сёян тырмытӧм вӧсна.

Кыдзи вӧлӧм висьталӧ ыджыд мам: «Сьӧкыд вӧлі война кадад. Мыйлакӧ зэв омӧля воис картупель, шобді-зӧр. Турун скӧтлы вӧлі ваялам нопйӧн зэв ылысь. Кулям вӧлі кач (пипулысь либо козлысь) да сёям. Тоям изкиӧн зӧр да пу тоинъясад льӧм тусь тоям. Чукӧртам быдсикас турун. А чай заварка пыддиыд сэтӧр да льӧм коръяс заваритам. Сэсся артельччам да каям пӧперечка пилаӧн пӧрӧдчыны. Вежон кык ветлӧдлам, дерт, пила тӧчытыштысь некод абу, ныж пиланад уна он пилит, сэсся ставсӧ ваялам вӧлӧн, кодлӧн эм, либӧ даддьӧн. Сэсся воас гӧран кад, витӧ-квайт нывбаба, тожӧ артельӧн, кыскалам вылын гӧр. Ӧтарӧ-мӧдарӧ, ставӧн зэв кокньыд паськӧмаӧсь да и кокад прамӧя сюйны вӧлі нинӧм. Кысысь (сійӧ кӧмсӧ вурӧны кӧр да кукань кучикысь) вӧлі вуралам кӧмкот да кӧвйӧн кок черйӧ кӧрталам. Кодсюрӧ весиг кӧвсӧ вӧлі кыӧны разнӧй кӧвйысь, мед тшапитчыштны-баситчыштны. Рытнад кыам-печкам сартас улын, кодлӧн керосинтор вӧлі – вӧлі ӧзтӧны толькӧ сэк, кор артельӧн гӧсьтъяс локтасны. Водзын ӧд ломтам вӧлі сьӧд горъя пывсянтӧ да став матігӧгӧрсасӧ и рӧжвужтӧ корам пывсьыны. Вӧчам ыджыд дозйӧ кунва (пӧимысь) да зэв лӧсьыда вӧлі мыськӧ юр и песласьны позьӧ. Ваыс нильӧгмӧ да бура песлалӧ. Сэсся локтігкежланыс вӧчалам выль занавесъяс, газетысь. Босьтам газет, помъяссӧ узорӧн ножичӧн вундалам, шӧрас тожӧ розьторъяс вӧчыштам. Локтасны и шуӧны: «Вот и мича тіян занавесыд, узоръяса да». Колхозад вӧлі уджалӧны сёрӧдз да водз петӧны удж вылад. Локтасны вӧлі гырысь баржаяс, ваясны сов да пызь мешӧкъястӧ. Ставсӧ вӧлі катлам вылын, ӧд мужикъясыд абуӧсь. Сэсся коркӧ юклыштасны семъяясад, кодлы мыйтаӧн.»

Война кадсӧ кӧть ми эг и аддзывлӧй, но ыджыд мамуклӧн чукрасьӧм, сӧн петалӧм кияссьыс вӧлі позьӧ гӧгӧрвоны – став сьӧкыдыс сюрлӧма...

А менам синъясын да сьӧлӧмын ыджыд мам колис небыд сьӧлӧм, зіль, сюсь да авъя, чӧскыд нянь пӧжалысьӧн. Да и мойдъясыс колисны паметьӧ, лӧсьыда жӧ вӧлі мойдӧ, гашкӧ, дзонь книгатыр юрас видзӧ да. Ме век гу вылӧ ветлывла сы дорӧ, сьӧлӧмын шуа: «Прӧстит менӧ, ыджыд мамукӧй, гашкӧ коркӧ и кывзысьтӧг овлі...»

Петросян Рустам
8 «б» класс, 2005 во

 

Войнаыд абу сӧмын тыш ...

Менам ыджыд мам висьталӧ, мый сылӧн вӧлӧма чой Лужикова Евдокия Ефимовна. Чужӧма 1915 воын. Война заводитчигӧн сылы вӧлӧма 26 арӧс. Чужлӧма Шахсиктын. Сылӧн вӧлӧма пи, Ӧльӧксей нима. Олӧмаӧсь сьӧкыда. Нянь-пызьыд абу. Сёяныд этша. Асывсянь рытӧдз уджалӧмаӧсь. Тӧвнас Евдокия Ефимовна кыйӧма уркай. Удж вылас мунігӧн Ӧльӧксейлы шуӧма: «Эн сёй тайӧ уркайсӧ. Удж вылысь локтӧм бӧрын шыд пуам да сёям». А удж вывсьыс локтӧм бӧрын уркайтӧ некытысь абу аддзӧма да юалӧма Ӧльӧксейыслысь: «Ӧлюк, кӧн нӧ уркайыд?» А сійӧ шуӧма, мый сёйӧма уркайтӧ ставнас, весавтӧг ни куштытӧг.

Ӧні Лужикова Евдокия Ефимовна кулӧма нин, но сылӧн олӧмыс век на кольӧма ыджыд мамлӧн вежӧрас.

Шебырев Василий I
8«б» класс, 2005 во

 

Ыджыд войнаысь сӧмын ӧти лун

Казьтылӧ Пожӧгдінса олысь.

Ми олім зэв бура, но заводитчис война. И менсьым ыджыдджык вокӧс нуисны война вылас. Шуисны сійӧс Мартюшев Андрей Ивановичӧн. Ме зэв лӧсьыда помнита, кыдзи Андрейӧс нуисны фронт вылӧ. И со воис письмӧ Андрейсянь:

«Привет. Кыдзи оланныд-выланныд, гортса олысьяс? Ичиньӧ, Анна, Михаил, разрешитӧй пасйыштны некымын кывъя письмӧ. Ме тіянӧс поздравляйта кызь витӧд Великӧй Октябрскӧй Социалистической революциялӧн годовщинаӧн. Находитча ме фронт вылын. Первойсӧ зэв ёна полі снарядъяслӧн взрывайтчӧмысь, но ӧні велалі да ог пов. Праздник ми празднуйтім бура. Штабсянь сетлісны вина, сто граммӧн морт вылӧ. Кык лун шойччим. Олам зэв лӧсьыда, кынӧмӧй пӧт. Узьлам землянкаын, тані эм пач. А землянкасӧ пытшсяньыс шпалеруйтӧма. Неважӧн снимайтчи, да ӧти фотокарточка ыста тіянлы. Ме гижлі уна письмӧ, но ӧтветсӧ тіянсянь эг пӧлучит. Колӧкӧ, письмӧясӧй эз вонытіянӧдз. Но гижны особеннӧ сэсся нинӧм. Передайтӧй привет рӧдвужлы, тӧдсаяслы.

Менам адрес: БКА почтовая. Полевая станция № 15. 777 часть. Мартюшеву Андрею Ивановичу.

8 февраля 1942 года».

Мартюшев Артём
8 «б» класс, 2005 во

 

 

Менам пӧч

Менсьым пӧчӧс шуӧны Мария Степановна Тимушеваӧн. Сійӧ чужлӧма 1925 воын Дон сиктын. Бать-мамсӧ, Степан Дмитриевич да Анастасия Ивановна Павловъясӧс, кулачитлӧмаӧсь. Пӧчӧ вӧлӧма семьяас медыджыдӧн, медся дзоля вокыслы – 3 арӧс. Нӧшта вӧлӧма пӧрысь, 80 арӧса, баб.

А война йылысь пӧчӧ со мый висьталӧ: «Заводитчис Великӧй Отечественнӧй вой­на, батьӧс босьтісны жӧ. Воюйтіс вит во чӧж, локтіс ёна ранитчӧмӧн. Осколок жугӧдӧма черлысӧ, кывйыс ӧшалӧ. Госпиталяд черлытӧ йитӧмаӧсь, лядьвейсьыс яйсӧ вундӧмаӧсь да тшӧкасӧ вӧчӧмаӧсь, кывсӧ вурӧмаӧсь, а вердӧны вӧлӧм сюрнёньысь. Локтіс гортӧ да, батьӧс эг тӧдӧй, чужӧмсӧ дзоньнас гартӧмаӧсь бинтӧн. Дыр на перевязка вӧчалісны, лоӧма инвалидӧн.

Война кадас, 1942 воын, менӧ мӧдӧдісны ФЗО-ӧ велӧдчыны столярӧ. Помалӧм бӧрас индісны том нывъяскӧд Кулӧмдін комбинатӧ. Сэні вӧчалім улӧсъяс, диванъяс, бӧчкаяс, уджалім столярӧн и бондарӧн. Комбинатас вӧлі тшӧтш мастерскӧй – вурисны, вӧчисны, дӧмисны кӧмторъяс, вӧліны вурсян да столярнӧй мастерскӧйяс, вуралісны платтьӧяс да челядьлы паськӧм.

Нёль во да джын уджалі комбинатад. Тайӧ каднас пышйывлі гортӧ, но бӧр корисны, да лэччи жӧ, но пышйылӧмсьыд накажитісны – 4 тӧлысь принуд судитлісны удждонысь 20 процент бергӧдӧмӧн. Принудсӧ уджалӧм бӧрын кайи гортӧ. Та бӧрын уналаын на уджалі, олӧм туйыд тай кытчӧкӧ век чукыльтӧ».

Ӧні пӧчӧлы 79 арӧс. Но арлыд вылӧ видзӧдтӧг, пыр на варов, йӧзкӧд сибыд, шмонитны радейтысь Ань. Пӧчӧ шуӧ: «Окота на надейтчыны миян президент В.В. Путин да правительство вылӧ, мый найӧ бергӧдчасны йӧзлань чужӧмӧн, а сідзкӧ, и сиктса олысьяслань. Эска, ӧд бур вылӧ лачатӧг овны оз позь».

Тимушева Марина
86 класс, 2005 во

 

 

Ая-пиа

Кӧсъя висьталыштны ая-пиа йылысь, кодъяс кыкнанныс тӧдлісны войналысь кӧрсӧ. Батьсӧ шуисны Мартюшев Пётр Порфирьевич. Чужлӧма декабрь 10-ӧд лунӧ, 1898 воын.

Тайӧ мортыс прӧйдитӧма куим война пыр. Вӧлӧма 16 арӧс, кор босьтӧмаӧсь Первой Мирӧвӧй война вылӧ. Бӧрынджык Пётр Порфирьевич участвуйтӧма гражданскӧй война вылын. И вот тайӧ мортыс мунӧма коймӧд война вылӧ, кытысь сійӧ бӧр ловйӧн локтас гортас.

А вот писӧ найӧ некор нин абу аддзывлӧмаӧсь. Сійӧс шуисны Мартюшев Юрий Петровичӧн. Чужлӧма 1924-ӧд вося июль тӧлысьӧ. Фронт вылӧ нуӧмаӧсь 1942 вося август тӧлысьӧ. Зонлы вӧлӧма 18 арӧс.

Лои сідз, мый ая-пиа веськалісны ӧти карӧ, Великие Луки кар дорӧ. Вӧлі февраль 23-ӧд лун, кор усьӧ «смертью храбрых» пиыс. А батьыс тайӧ жӧ луннас ёна ранитчӧ.

Гортас локтӧм бӧрын заводитӧма предавны. Но кутшӧмкӧ омӧль письмӧ вӧсна сійӧ 6 во кежлӧ пуксьӧдӧмаӧсь Воркутаӧ. Военнӧй цензура лыддьӧма тайӧ мортсӧ народлӧн врагӧн, кӧть эськӧ тай мортыс муніс куим война пыр. Пуксьӧдлӧм бӧрад Пётр Порфирь­евич олӧма регыд. 1971 вося май первой лунӧ сійӧ кувсьӧ.

Да, эз кокньыд вӧв туйыс Победа лунӧдз. Эз этша шог да курыд усь роч йӧз выло. И медводз колӧ аттьӧавны да помнитын налӧн подвигъяс йылысь, кодъяс ассьыныс юрсӧ пуктісны Рӧдина вӧсна.

Мартюшев Михаил
8 «б» класс, 2005 во

 

Война кадся казьтылӧм

Третьякова Нина Сергеевналӧн война кад йылысь ӧти казьтылӧм: «Война кадын мем вӧлі дас кык арӧс. Миян сиктысь мунісны став мужичӧйыс. Менам батьӧй тшӧтш. Некымын лун мысти миянлы воис татшӧм юӧр: «Тіян батьныд, Сергей Третьяков, ранитчис. Ӧні сійӧ госпитальын. Виччысьӧй, регыд бӧр локтас». Мамӧ и радліс, мый верӧсыс ловйӧн война биысь петӧма, и жалитіс верӧссӧ. Но бать некымын лун мысти локтіс гортӧ.

И кыйис мужик мортыд неыджыд кӧчӧс. Сійӧ луннас и пуим шыд. А сійӧ кӧчтӧ ми пуим куим тӧлысь чӧж ичӧтика пуктыштӧмӧн. Шыдным бырны кутіс, а миян дінӧ локтіс тӧдтӧм морт да кутіс корны шыд. Но ме шуи, мый миян шыдыс этша. Сійӧ бӧрддзис. И ме сеті зептысь кос яй, кодӧс асывнас босьті гортысь. Тшыгвывсьыд курччис яйсӧ, да мортыдлӧн кутіс петны вир. Бӧрынас ме казялі, мый сійӧ курччӧма чуньсӧ. Ме первойсӧ повзи да котӧрті мамӧ дорӧ. Но мамӧ бӧрынас висьталіс, мый ӧні олӧмыс зэв сьӧкыд и ставныс тшыгъялӧны. Сы бӧрын ме тайӧ мортсӧ эг нин аддзыв.»

Попов Сергей
5 «б» класс, 2005 во

 

Ичиньлӧн казьтылӧм

Менсьым ичиньӧс шуӧны Мартюшева Анастасия Николаевнаӧн. Тайӧ нывбабаыс веськавліс война вылӧ.

Война сувтан воӧ Анастасия Николаевналы вӧлі 14 ар. Мӧдлапӧлын вӧлӧм пуктӧны турун, мужичӧйяс и нывбабаяс. Лун шӧр кадӧ локтӧма ӧти мужичӧй, Вась нима, да горӧдӧма бӧрдігтыр: «Заводитчис пеж война, корисны став мужичӧйӧс война вылӧ!» Сэк нывбабаяслӧн чужис уна пӧлӧс мӧвп. Кодкӧ бӧрддзис, кодкӧ висьмымӧн туплясис-горзіс му вылын. Тайӧ вӧлі ыджы шог и мужичӧйяслы, и нывбабаяслы. Ковмис велӧдчыны нывбабалы тракторӧн вӧдитчыны.

Анастасия Николаевна уджаліс ичӧтсянь. Кер пӧрӧдісны, кылӧдісны...

Мед тайӧ пеж войнаыс оз жӧ нин ло выльысь!

Третьякова Наталья
5 «б» класс, 2004 во

 

 При использовании материала не забудьте указать источник!

Яндекс.Метрика   Яндекс тИЦ

 

uchastnic
Проект при поддержке
RU-CENTER

3 relarn

Ассоциация РЕЛАРН

komiedu160x100 ruouk