Меню сайта

Система Orphus

Система Orphus

Нашли ошибку, опечатку, неверную информацию - выделите при помощи ЛКМ и нажмите Ctrl + Enter

Вход

Для зарегистрированных пользователей

Победа одна на всех

 

Победа дзик ставлöн öти

"Победа одна на всех" - так называется небольшой сборник стихотворений Елены Александровны, учителя коми языка и литературы.

Победа дзик ставлӧн ӧти

Победа! Кутшӧм ыджыд донӧн,
Тэ шедiн ӧтувтчӧм страналы!
Став пилы, кодi олӧм пуктiс,
Став мамлы, кодi найӧс быдтiс,
Став челядьлы, код война кадӧ
Тшӧтш сувтiс гырысьяскӧд радӧ,
Победаыс – дзик ставлӧн ӧти,
И кымын кад мед коляс кӧть и.
Дзик ставлы таысь –
Муӧдз копыр!
И мед война оз ӧзйы НЕКОР!
Мед олас Мир. Мед олас праздник.
Мир видзысьясыс ӧнi – асьным!

   ***

 Мамлӧн киын шӧртыс орӧма

Мамлӧн кысигас шӧртыс орӧма –
Гашкӧ, вӧсниа вӧлi печкӧма,
Гашкӧ, кысьӧмыс синва сора да,
Ёна мудзысла унмыс личкӧма.

Эськӧ сьӧлӧмыс ёна доймӧ да,
Кодлы та йылысь ӧнi висьталан,
Куим во чӧжнад ада войнаыд
Став бур йӧзлысь нин синва кисьтӧма.

Ӧтка пиыс со бӧръя письмӧын
Вӧлi виччысьны ёна корӧма…
Мамлӧн киын со шӧртыс орӧма –
Пилы смертьсӧ мӧй сiйӧ корӧма?!

    ***

Нывка котӧртӧ ылi видз вылӧ

Нывка котӧртӧ ылi видз вылӧ,
Ытшкӧм вывтiыс коксӧ дойдалӧ,
Вирӧдз курччалӧ мича вомдорсӧ,
Тӧвзьӧ-котӧртӧ аслас мам дорӧ.

Синва визувтӧ чужӧм кузяыс,
Быттьӧ вӧрса ёль другысь письтӧма.
Киас – бать вылӧ похоронкаыс…
Челядь кокӧн тшӧтш шогыс волывлiс.

    ***

А став синва кӧ...

А став синва кӧ быттьӧ кывтiс война кадсяыс ӧти сорӧн,
Сэки Эжваным эськӧ кывтiс сьӧлӧм поткӧдан ызган горӧн.

Узьтӧм войясыс дӧва-мамлӧн – быттьӧ куслытӧг ӧзйысь кыа,
Усьӧм верӧскӧд мӧвпа сёрни – сувтса зэр дырйи гымлӧн шыа.

Батьтӧм челядьлӧн шудтӧм олӧм эськӧ жугӧдiс войся чӧвсӧ,
Война кадӧ кор, ачыс кага, войбыд уджӧдлiс быгзьӧм вӧвсӧ.

Усьӧм войтырлӧн доя паметь йӧзлӧн сьӧлӧмын медым олас –
Ставсӧ чукӧртны, ставсӧ видзны мирнӧй олӧмыс ради колӧ.

    ***

Вошӧм пи кузя бӧрданкыв.

Югыд шондiӧй да дона пиукӧй,
Сьӧлӧмшӧрӧй да зарни быдтасӧй.
Эськӧ чужтi тай мувыв анделӧс,
Мувыв анделӧс, да любуйтчӧм вылӧ.

Вердi йӧлӧн да шоныд морӧсысь,
Рӧдкӧд йитӧдыс мед оз орӧдсьы.
Эськӧ быдмин тай ,бравӧй молодеч,
Бравӧй молодеч, парма пожӧм кодь.

Ыджыд туша да паськыд пельпома,
Мича нылӧс нин вӧлi бӧрйӧма,
Муса гӧтырпу дзик выль керкаӧ,
Ме внук-внучкалы ним нин бӧръялi.

Ставсӧ жугӧдiс, ставсӧ пазӧдiс,
Сьӧд война йылысь курыд юӧрыс,
Зарни пиукӧй, доброволечӧн
Мунiн чужан му врагысь дорйыны.

Мунiн чужан му эськӧ дорйыны,
Кӧсйин воны да Петыр лун кежлӧ,
Уна Петыр лун сэсянь волывлiс,
Уна пызан нин мамыс лӧсьӧдлi.

Мамлысь пирогсӧ, небыд шаньгасӧ
Мыйла, зарни пи, тэ он видлывлы?
Ичӧт лэбачыс менам ӧшиньӧ,
Мыйла гольӧдчӧ? Мыйла тотшкӧдчӧ?

Кодi лысьтӧма тайӧс висьтавны,
Чорыд тышын пӧ быттьӧ усьӧмыд?
Эг мӧй удит да мамыс сайӧдны,
Збыль мӧй Енмыслы этша кевмыси?

Сӧмын асывнас, дона пиукӧй,
Чайта, вуджӧртан Эжва туйӧдыс,
Кытi мунiгад буретш саялiн,
Мамлӧн сьӧлӧмыс оз жӧ ылӧдлы…

   ***

Иван Андреевич Уляшевлы,
Кекур грездысь война вылын усьӧм зонлы, сиӧма.

Дона пиукӧй дай Иванӧй, Уляшевӧй дай свет Андреевичӧй. Ичӧтик Сьӧдтыдiн грездын чужлiн да быдмин, эн удит верстяммыны прамӧя рамыдла. Ӧти том нылӧс колльӧдны ни сьӧлӧм бердад топӧдлыны эн удит.

Некодӧс тай эз жалит сьӧлӧмтӧм сьӧд войнаыд. Дженьыд тай вӧлӧма олан туйыд, сьӧлӧмшӧр пиӧй. Ёна жӧ гортад окота вӧлӧма, уна во мысти кӧ век жӧ воӧдчин. Ёна кӧнкӧ, и вӧзйысин, ёна, кӧнкӧ, и кевмысин.

Ӧтка тури тай сикт весьтас горзiс-лэбалiс. Эз-ӧ тэ нимсянь сiйӧ чукӧстчы чужан му весьтас. Эз-ӧ тэнӧ да Ен водзас сiйӧ сьылӧд. Ленинград дорын танкын ловъя вывсьыд сотчӧма мученикӧс.

Ачыд тай мича да ён детина вӧлiн, да останокыд ичӧт табак ящикӧ и тӧрӧма, дитяӧй пиӧй. Прамӧй йӧзлӧн пиян тай меститӧмаӧсь братскӧй гуӧ.

Сӧмын корсим ми тэнӧ, сьӧлӧмшӧрӧй, уна вояс чӧж. Бур йӧз сорӧн чужан муад, сьӧлӧмшӧр пиукӧй, вежа мутӧ меститӧма лои. Аттьӧ, донаӧй, гортад локтӧмысь…

    ***

Одним файлом скачать

 

При использовании материала не забудьте указать источник!

 

 

Яндекс.Метрика   Яндекс тИЦ

 

uchastnic
Проект при поддержке
RU-CENTER

3 relarn

Ассоциация РЕЛАРН

komiedu160x100 ruouk